Ro Department of Social Welfare and Development (DSWD) Field Office 6, gobyerno probinsyal it Aklan ag limang ka mga kabanwahunan iya hay magapirma sa sangka Memorandum of Agreement (MOA) sa Gov. Roberto Q. Garcia Memorial Building sa Marso 21 it rayang dag-on.

                Ro pagpirma it MOA, suno  kay DSWD 6 Regional Director Minda Brigoli, hay pormal nga magalunsar it Kapit Bisig Laban Sa Kahirapan – Comprehensive and Integrated Delivery of Social Services (CIDSS) MCC Project sa mga banwa it Batan, Ibajay, Makato, New Washington, ag Tangalan ag himuon man nga opisyal ro kasugtanan sa mga kaibahan sa pag implementar it programa.

                May pagahiwaton man nga press conference kaibahan ro mga katapu it media pagkatapos it MOA Signing.

                Ro KALAHI hay imaw rong programa it gobyerno para sa nakasentro, madasig ag maeaparan nga stratehiya sa pagpahagan-hagan it kapobrehon.

                Tuyo kara, suno sa DSWD, nga magtao it bulig sa pagpatigayon it mga serbisyo sa ikamayad it mga tawo, pagpabaskog sa kapasidad ag pagpartisipar sa pag gobyerno.

                Ro CIDSS hay imaw ro unang programa it gobyerno sa pagpahagan-hagan sa kapobrehon.

                Ro pundo para sa pag implementar it KALAHI-CIDSS sa limang ka mga banwa hay magahalin sa Millennium Challenge Corporation (MCC).

                Sa idaeum it programa, kada barangay hay magabaton kada dag-on it P450,000 nga pundo, kon siin raya hay pagagamiton impon ro pundo it ibang barangay sa pagtukod it sari-saring mga proyekto pareho ku pag obra it mga karsada, tulay, irigasyon, eskuylahan o iba pa nga gin determinar nga kinahangeanon sa komunidad ag abu nga maka benefisyo.

                Antes ro limang ka mga banwa, may daywang haunang pilot municipalities it KALAHI-CIDSS sa Aklan.

                Raya ro Libacao, nga may 24 nga barangay, ag Madalag, nga may 25, nga nag-umpisa eon it implementar it programa ngara ku 2011.

                Ro KALAHI-CIDSS hay gina implementar man sa mga probinsya it Iloilo, Negros Occidental ag Capiz.  (JSC/VGV-PIA 6 Aklan)